“Kapital Bank” ASC 2020-ci il üzrə gəlir və xərc proqnozunu açıqlayıb.

Fins.az xəbər verir ki, Azərbaycanın ən iri özəl banklarından biri olan “Kapital Bank” 2020-ci ili üzrə 217 milyon 610 min manat xalis mənfəət hədəfləyir. Əgər bu hədəf reallaşarsa, 2019-cu illə müqayisədə 2020-ci ildə “Kapital Bank”ın xalis mənfəəti 82 milyon 902 min manat və ya 61,5% artacaqdır. Belə ki, Bank 2019-cu ili 134 milyon 708 min manat xalis mənfəət ilə başa vurmuşdu.

217 milyon 610 min manat xalis mənfəətin əldə edilməsi “Kapital Bank”ın tarixində ən yüksək xalis mənfəət məbləği olacaqdır.

“Kapital Bank”ın xalis mənfəəti ildən-ilə artır. Bank 2017-ci ildə 94 milyon 839 min manat, 2018-ci ildə isə 98 milyon 53 min manat xalis mənfəət əldə etmişdi.

ARTIQ HƏDƏFƏ 80% NAİL OLUB

2020-ci ilin 1-ci yarısı üzrə mənfəət göstəricisi “Kapital Bank”ın 2020-ci il üzrə 217 milyon 610 min manat xalis mənfəət hədəfinə rahat çatacağına işarə edir. Belə ki, Bank 2020-ci ilin 1-ci yarısını 170 milyon 556 min manat xalis mənfəət ilə bağlayıb. Qısası, Bank hədəfə 80%-ə yaxın nail olub.

GƏLİRLƏRİNİN ARTACAĞI PROQNOZLAŞDIRILIR

“Kapital Bank”ın 2020-ci ildə 628 milyon 335 min manat cəmi gəlir əldə edəcəyi, bunun 470 milyon 811 min manatını faiz, 157 milyon 524 min manatını qeyri-faiz gəlirləri təşkil edəcəyi gözlənilir. Bank 2019-cu ildə 571 milyon 301 min cəmi gəlirlər əldə etmiş, bu gəlirlərin 400 milyon 956 min manatını faiz, 170 milyon 345 min manatını qeyri-faiz gəlirləri təşkil etmişdi.