“Azərbaycan Beynəlxalq Bankı” ASC 2019-cu ili 302 milyon 316 min manat xalis mənfəət ilə başa vurub. 2018-ci illə müqayisədə 2019-cu ildə Beynəlxalq Bankın xalis mənfəəti 123 milyon 524 min manat və ya 29% azalıb. Belə ki, Bank 2018-ci ili 425 milyon 841 min manat xalis mənfəət ilə başa vurmuşdu. Mənfəətin azalması, Beynəlxalq Bankın gəlirlərinin azalmasından deyil, əvvəlki illər yaradılmış ehtiyatdan azadolmanın azalması və ötən il mənfəət vergisinin ödənilməsi ilə bağlıdır.

FAİZ VƏ QEYRİ-FAİZ GƏLİRLƏRİ ARTIB

Fins.az xəbər verir ki, 2018-ci illə müqayisədə 2019-cu ildə “Azərbaycan Beynəlxalq Bankı”nın faiz gəlirləri 26 milyon 840 min manat və ya 6,5% artaraq 441 milyon 940 min manat, qeyri-faiz gəlirləri isə 27 milyon 352 min manat və ya 23,6% artaraq 143 milyon 411 min manat təşkil edib.

2018-ci illə müqayisədə 2019-cu ildə “Azərbaycan Beynəlxalq Bankı”nın faiz xərcləri 20 milyon 224 min manat və ya 17% azalaraq 98 milyon 161 min manat, qeyri-faiz xərcləri isə 48 milyon 442 min manat və ya 41,3% artaraq 165 milyon 669 min manat təşkil edib.  

ƏMƏLİYYAT MƏNFƏƏTİ ARTIB

Faiz və qeyri-faiz gəlirlərinin cəmi 54 milyon 192 min manat artması ilə paralel faiz və qeyri-faiz xərcləri 28 milyon 218 min manat artıb. Gəlirlərin artması xərclərin artmasını üstələdiyindən “Azərbaycan Beynəlxalq Bankı”nın əməliyyat mənfəəti illik müqayisədə 25 milyon 974 min manat artaraq ötən il 321 milyon 521 min manat təşkil edib. 2018-ci ildə Bankın xalis əməliyyat mənfəəti 295 milyon 547 min manat təşkil etmişdi.

2018-ci ildə mümkün zərərlər üçün yaradılan məqsədli ehtiyatlardan 130 milyon 294 min manat azad olması hesabına Beynəlxalq Bankın mənfəət vergisindən əvvəlki mənfəəti 425 milyon 840 min manat təşkil etmişdi. Həmin il Bank mənfəət vergisi ödəməmişdi.

2019-cu ildə isə mümkün zərərlər üçün yaradılan məqsədli ehtiyatlardan azadolma 2,4 dəfə və ya 77 milyon 27 min manat azalaraq 53 milyon 267 min manata təşkil edib. Azadolmadan sonra ötən il Beynəlxalq Bankın mənfəət vergisindən əvvəlki mənfəəti 374 milyon 788 min manat təşkil edib. Həmçinin Bank 72 milyon 472 min manat mənfəət vergisi ödəyib.

Bankın biznes fəaliyyətinin nəticəsini daha doğru göstərən əməliyyat mənfəətinin 8,8% artmasına baxmayaraq xalis mənfəətin 29% düşməsi ehtiyatlardan azadolmanın azalması və mənfəət vergisinin ödənilməsi ilə bağlıdır.

BANKIN BÖYÜKLÜYÜ 10 MİLYARD MANATA YAXINLAŞIR

2018-ci ilin sonu ilə müqayisədə 2019-cu ildə Beynəlxalq Bankın cəmi aktivləri 1 milyard 290 milyon 590 min manat arataraq 9 milyard 223 milyon 361 min manata, o cümlədən müştərilərə verilmiş kreditlər 451 milyon 952 min manat artaraq 2 milyard 374 milyon 984 min manata yüksəlib.

© Marja