Ötən il “Azərbaycan Sənaye Bankı” böyüyüb, müştərilərə verdiyi kreditlər, investisiyaları, faiz və qeyri-faiz gəlirləri artıb
Fins.az xəbər  verir  ki, "Azərbaycan Sənaye Bankı” ASC 2019-cu ili 7 milyon 689 min manat xalis mənfəət ilə başa vurub. 2018-ci illə müqayisədə Bankın xalis mənfəəti 2 dəfə artıb. Belə ki, “Azərbaycan Sənaye Bankı” ASC 2018-ci ili 3 milyon 945 min manat xalis mənfəət ilə bağlamışdı.
“Marja” Bankın maliyyə göstəricilərinə istinadən xəbər verir ki, 2019-cu ildə “Azərbaycan Sənaye Bankı”nın cəmi faiz və qeyri-faiz gəlirləri 38 milyon 643 min manat, cəmi faiz və qeyri-faiz xərcləri isə 28 milyon 855 min manat təşkil edib. Gəlirlər xərcləri üstələdiyindən 9 milyon 788 min manat əməliyyat mənfəəti yaranıb. Əməliyyat mənfəətindən 119 min manat aktivlər üzrə mümkün zərərlərin ödənilməsi üçün xüsusi ehtiyatın yaradılmasına ayrılıb və 1 milyon 979 min manat mənfəət vergisi ödənilib. Nəticədə, Bank ötən ili 7 milyon 689 min manat xalis mənfəət ilə başa vurub.
Müqayisə üçün qeyd edək ki, 2018-ci ildə “Azərbaycan Sənaye Bankı”nın cəmi faiz və qeyri-faiz gəlirləri 27 milyon 586 min manat, cəmi faiz və qeyri-faiz xərcləri isə 25 milyon 795 min manat, əməliyyat mənfəəti 1 milyon 791 min manat təşkil etmişdi. Aktivlər üzrə mümkün zərərlərin ödənilməsi üçün xüsusi ehtiyatın 3 milyon 167 min manatının azad olması hesabına Bankın vergidən əvvəlki mənfəəti 4 milyon 957 min manata, xalis mənfəəti isə 3 milyon 945 min manata yüksəlmişdi.
2018-ci ildə Bankın 24 milyon 888 min manat təşkil etmiş faiz gəlirləri 2019-cu ildə 28 milyon 283 min manata, qeyri-faiz gəlirləri isə 2 milyon 698 min manat ikən, 2019-cu ildə 10 milyon 360 min manata yüksəlib.
31 Dekabr 2019-cu il tarixində “Azərbaycan Sənaye Bankı” ASC 985 milyon 151 min manat cəmi aktivlərə (o cümlədən 331 milyon 402 min manatı müştərilərə verilən kreditlər, 543 milyon 274 min manatını digər banklarda yerləşdirilən depozitlər) təşkil edib. 31 Dekabr 2018-ci il tarixində “Azərbaycan Sənaye Bankı” ASC 822 milyon 311 min manat cəmi aktivlərə (o cümlədən 285 milyon 949 min manatı müştərilərə verilən kreditlər, 461 milyon 233 min manatını digər banklarda yerləşdirilən depozitlər) təşkil etmişdi.
“Azərsun Holdinq”in rəsmi saytında “qrup şirkətləri” siyahısında “Azərbaycan Sənaye Bankı”nın adı da yer alıb.
 “Azərbaycan Sənaye Bankı”nın səhmdarları - “Anadolu İnvestment Kompani” MMC (98,4252%), “Azərbaycan Sənaye Lizinq” MMC (0.5748%) və Leyla Gozaldır (1%).