Dövlət Neft Şirkətinin (SOCAR) 2016-cı ilin oktyabr ayında dövriyyəyə buraxdığı istiqrazlar ölkənin qiymətli kağızlar bazarının inkişafına müsbət təsir edib. 

Fins.az xəbər verir ki, bunu SOCAR-ın maliyyə bazarları üzrə baş məsləhətçisi və “SOCAR Capital” MMC-nin Məşvərət Şurasının üzvü Əli Ağaoğlu deyib.

"SOCAR istiqrazlarının dövriyyəyə buraxılması həm kapital bazarlarının inkişafı, həm də evlərdəki, yastıq altındakı pulların Azərbaycan iqtisadiyyatına cəlb olunması üçün həyata keçirilmiş bir layihə idi. O vaxt bu proses bir qədər vaxt apardı. Çünki insanlarda istiqrazın nə olması, bu bazarın necə inkişaf etməsi barədə fikirlər elə də yaxşı deyildi. İstiqrazlar fond bazarına inamsızlığın olduğu bir dövrdə bazara çıxarıldı. O vaxtdan bu günə qədər hər faiz ödənişində insanlara SOCAR istiqrazları və ümumilikdə qiymətli kağızlar bazarı barədə izahat verdik, həm bunun, həm də faizlərin vaxtında ödənilməsi hesabına inam yaranmağa başladı", - o qeyd edib. 

SOCAR rəsmisinin sözlərinə görə, şirkətin bu istiqrazların geri alınmasına zəmanət verməsi də insanlara həmin qiymətli kağızlara inam yaradıb: "Biz marketmeykerlər vasitəsilə likvidliyi təmin etdik və SOCAR istiqrazları ilə əməliyyatlar artdı. Hətta bu istiqrazlarla repo əməliyyatları da həyata keçirildi və bu əməliyyatların ümumi dəyəri 33 milyon ABŞ dollarını keçib. Hazırda SOCAR istiqrazları repo əməliyyatlarına cəlb olunmuş yeganə qiymətli kağızdır". 

Ə.Ağaoğlu onu da bildirib ki, Azərbaycan bankları SOCAR istiqrazlarının hesabına daha bir imkan əldə edə bilər: "Azərbaycan Mərkəzi Bankı ilə danışıqlar aparılması planlaşdırılır. Məqsəd odur ki, banklar əldə etdikləri istiqrazları girov kimi tənzimləyici qurumda qoyub valyutaya olan qısamüddətli ehtiyaclarını ödəsinlər". 

(c)Report