Finss.az - Dünya elektrikli avtomobillər bazarı ağır dövrlər yaşayır.

Bir sıra aparıcı avtomobil istehsalçıları, xüsusilə Volkswagen və Nissan, satışlarda azalma və maliyyə çətinlikləri ilə üzləşirlər. Şirkətlər xərcləri azaltmaq, yeni strategiyalar tətbiq etmək və alıcı cəlb etməyin yeni yollarını tapmağa çalışırlar.

Almaniyanın avtomobil nəhəngi Volkswagen, 2024-cü ildə əməliyyat marjasının 5,9%-ə qədər düşdüyünü açıqlayıb. Şirkətin ümumi satışları 3,5% azalarak 9 milyon ədədə enib. Xüsusilə Çin bazarındakı azalan tələbat şirkəti narahat edir. Lakin, şirkət Qərbi Avropada elektrikli avtomobillərə olan sifarişlərin 88% artdığını qeyd edib. Bütün bu çətinliklərə baxmayaraq, Volkswagen radikal qənaət tədbirləri görərək 2025-ci ilə qədər 1 milyard avro qənaət etməyi planlaşdırır.

Yaponiyanın Nissan şirkəti də çətinliklərdən əziyyət çəkir. Maliyyə göstəricilərinin pisləşməsi və satışların uğursuzluğu fonunda şirkət baş direktorunu dəyişmə qərarı alıb. Nissan-ın 2024-cü ilin üçüncü rübündə mənfəəti 78% azalıb. Şirkət, xüsusilə Böyük Britaniya bazarında elektrikli avtomobillərə olan tələbin aşağı olmasına görə, bazardan çıxma ehtimalını da istisna etməyib.

İstehsal qiymətlərinin artması, Çin şirkətlərinin güclü rəqabəti və istehlakçıların elektrikli avtomobillərə olan marağının az olması sənayenin üzləşdiyi əsas çətinliklərdəndir. Volkswagen və digər böyük istehsalçılar, elektrikli avtomobillər və avtonom texnologiyaların inkişafına sərmayə qoymaqla yanaşı, daha sərfəli və cəlbedici modellər təqdim etməyi planlaşdırır.

Bütün bu çətinliklərə baxmayaraq, elektrikli avtomobillərin istehsalına davam etmə qərarı alınıb və sənayedəki strateji dəyişikliklər böyük böhranların qarşısını almağa yönəlir.