Finss.az - Elektrik avtomobilləri daha uzun məsafələrə səyahət etmək üçün hər keçən gün daha da uyğunlaşır və Tata Curvv.ev bunun ən yaxşı nümunəsidir.

Bu elektrik kupe-krossoveri Hindistan üzrə rekord bir məsafəni 76 saat 35 dəqiqə ərzində qət edərək yeni bir rekord qurub. Kəşmirdən Kanşikumariyə qədər 3,823 km-lik məsafəni aşan Tata Curvv.ev, əvvəlki nəticəni 19 saatdan çox təkmilləşdirib.

Bütün səyahət boyunca avtomobil 16 dəfə şarj üçün dayanıb. Mühəndislər isə ümumi şarj müddətini 28 saatdan 17 saata endirməyi bacarıblar. Bu, Hindistanda sürətli şarj şəbəkəsinin inkişafı və Tata-nın yeni batareya texnologiyalarının sayəsində mümkün olub.

Səyahət 25 fevralda səhər saat 4:00-da Şrinagar şəhərindən başlanıb və 28 fevralda səhər saat 8:35-də Kanşikumariyədə başa çatıb. Burada Tata Curvv.ev-ni yerli hakimiyyət nümayəndələri qarşılayıblar. Bu avtomobil, artıq 20 milli rekordla elektrik avtomobillərinin uzun məsafələrdə səyahət etməyə imkan verdiyini bir daha sübut edir.

Tata Curvv.ev-nin əldə etdiyi bu uğur, elektrik avtomobillərinin gələcək inkişafı və daha geniş istifadəsi üçün mühüm bir addım olaraq qiymətləndirilir.