Cari il Cəlilabad rayonunda payızlıq kartofun məhsuldarlığı ötən illə müqayisədə yüksək olub.

Fins.az xəbər verir ki, bu barədə Cəlilabad Dövlət Aqrar İnkişaf Mərkəzindən məlumat verilib.

Bu il rayonda 1 000 hektar sahədə təkrar əkin kimi payızlıq kartof əkilib və sahələrdən 7 000 tondan çox məhsul götürülüb. Orta məhsuldarlıq hər hektar üçün 17-20 ton təşkil edib ki, bu da ötən ilin 15-16 ton göstəricisi ilə müqayisədə artımdır.

Toplanmış məhsulun əksəriyyəti paytaxt bazarlarına göndərilir.

Bununla yanaşı, qeyd olunub ki, cari il ərzində Cəlilabad rayonunda 2 900 hektar sahədə yazlıq kartof əkilib və bu əkinlərdən 81 740 ton məhsul əldə olunub.