COP29 çərçivəsində keçirilən "Fermerlər üçün Baku Harmoniya iqlim təşəbbüsünün təqdimatı" tədbirində Azərbaycanın iqlim dayanıqlığını artırmaq üçün üç əsas maneəni necə aradan qaldırdığını vurğulanıb.

Fins.az xəbər verir ki,  bu barədə Azərbaycanın kənd təsərrüfatı nazirinin müavini İlhamə Qədimova COP29 çərçivəsində keçirilən "Fermerlər üçün Baku Harmoniya iqlim təşəbbüsünün təqdimatı: İqlim dəyişikliyinə qarşı dayanıqlığın artırılması üçün fermerlərin imkanlarının genişləndirilməsi" mövzusunda tədbirdə çıxışı zamanı bildirib.

1. Bilik Mübadiləsi

Fermerlərin ən yaxşı təcrübələrə və innovativ həllərə çıxış çətinliyi bu təşəbbüsün həll etdiyi əsas problemlərdən biridir.

“Baku Harmoniya” bilik mübadiləsi üçün mərkəz rolunu oynayacaq və qlobal dərsləri yerli səviyyədə tətbiq etməyə imkan yaradacaq. Bu, fermerlər üçün daha müasir və iqlimə dayanıqlı metodların tətbiqinə şərait yaradacaq.

2. Maliyyə Koordinasiyası

Mövcud maliyyə resurslarının parçalanması kənd təsərrüfatında irəliləyişin qarşısını alır. Bu təşəbbüs isə maliyyə imkanlarını mərkəzləşdirərək fermerlərin yeni texnologiyalara çıxışını artıracaq.

• COP29 çərçivəsindəki FAST (İqlim Maliyyələşdirilməsi Səfərbərliyi Təşəbbüsü) ilə əməkdaşlıq yolu ilə əlavə resurslar cəlb edilir.
• Yeni rəqəmsal texnologiyalar fermerlərə təqdim ediləcək, bu isə kənd təsərrüfatında səmərəliliyi artıracaq.

3. Birgə Fəaliyyətlər

Əməkdaşlıq və koordinasiya olmadan səylərin parçalanması ərzaq təhlükəsizliyi və iqlim tədbirlərində ciddi problemlər yaradır.

“Baku Harmoniya”, sektoral və regional sərhədləri aşan əməkdaşlığı təşviq edərək, ərzaq təhlükəsizliyi, su ehtiyatlarının qorunması və iqlim tədbirlərində daha sürətli nəticələr əldə etməyi hədəfləyir.

İnklüziv və Davamlı İnkişaf

Nazir müavini qeyd edib ki, bu təşəbbüs yalnız texniki və maliyyə aspektləri ilə məhdudlaşmır, həm də inklüziv inkişafı təmin etməyə yönəlib:

• Qadınların və Gənclərin Rolunun Genişləndirilməsi: Fermer icmalarında qadınlar və gənclərin kənd təsərrüfatında aktiv iştirakı dəstəklənir.
• Kənd İcmalarına Dəstək: Təlimlər, alətlər və maliyyə stimulları ilə kənd icmalarının dayanıqlığı artırılır.

Gələcəkdə İqlim Dayanıqlığı Üçün Koordinasiyalı Addımlar

“Baku Harmoniya” təşəbbüsü, Azərbaycanın kənd təsərrüfatında iqlim dayanıqlığını artırmaq üçün genişmiqyaslı və koordinasiyalı yanaşmanı təmsil edir. İlhamə Qədimova vurğulayıb ki, bu təşəbbüs yalnız yerli səviyyədə deyil, qlobal miqyasda da iqlim tədbirlərinin effektivliyini artırmaq üçün mühüm platformadır.

Fuad Mədətov
Fins.az