İqlim dəyişikliyi səbəbindən Azərbaycanda kənd təsərrüfatına ciddi ziyan vuran ekstremal hava hadisələrinin sayı son 30 ildə 14 dəfə artıb.

Fins.az xəbər verir ki, bu barədə Ekologiya və Təbii Sərvətlər Nazirinin müavini Rauf Hacıyev "COP29: Dayanıqlı Şəhərsalma və Ekoloji Çağırışlar" forumunda bildirib.

R.Hacıyev, Ümumdünya Meteorologiya Təşkilatının məlumatlarına əsasən, 2014-2023-cü illər arasında qlobal orta temperaturun 1.2 dərəcə Selsi artdığını vurğulayıb. Bu artım ekstremal hava hadisələrinin sayını artıraraq biomüxtəlifliyin azalmasına səbəb ola bilər. O, Azərbaycanda da iqlim dəyişikliyinin təsirlərinin hiss olunduğunu, ölkədəki orta temperaturun son 23 ildə 1.1 dərəcə Selsi yüksəldiyini qeyd edib.

Nazir müavini, son 30 ildə kənd təsərrüfatına ziyan vuran isti və quru küləklərin sayının 14 dəfə artdığını, dolu hadisələrinin isə son 10 ildə 3 dəfədən çox artdığını bildirib. Əvvəllər dolu hadisələrinin dağlıq və dağətəyi rayonlarda baş verdiyini, indi isə düzən ərazilərdə də müşahidə olunduğunu əlavə edib.

R.Hacıyev, həmçinin Azərbaycanın su ehtiyatlarının son 10 ildə təxminən 15% azaldığını, Xəzər dənizinin səviyyəsinin ciddi şəkildə aşağı düşdüyünü qeyd edib. Bu hal, sahilyanı ekosistem və biomüxtəlifliyə, eləcə də yaşayış ərazilərinə mənfi təsir göstərir.

Son olaraq, nazir müavini, Azərbaycanın yeni iqlim strategiyasının hazırlanması istiqamətində işlərin davam etdiyini, yeni strategiyanın aşağı karbonlu inkişafı əvəz edəcəyini vurğulayıb. O, COP29-un bu istiqamətdə ölkəyə müsbət irəliləyişlər gətirəcəyini, işğaldan azad edilmiş ərazilərdə yaşıl enerji layihələrinin həyata keçirildiyini və forumun iqlim dəyişikliyi məsələlərinə töhfə verəcəyinə inandığını bildirib.

Fuad Mədətov
Fins.az