Polşada kənd təsərrüfatı sektoru uragan Boris və onun səbəb olduğu daşqınlar nəticəsində ciddi zərər görüb.

Fins.az xəbər verir ki, daşqınlar ölkənin 120 min hektar əkin sahəsinə, yəni Polşanın ümumi kənd təsərrüfatı ərazilərinin 2%-dən çoxuna təsir edib. 2024-cü ildə 27 min hektar məhsul yığılmadan tarlalarda qalacaq ki, bu da böyük iqtisadi itkilərə səbəb olur. Zərər əsasən qarğıdalı, soya, kartof və şəkər çuğunduru sahələrində qeydə alınıb.

Polşanın Kənd Təsərrüfatı və Kənd İnkişafı Nazirliyi, daşqın nəticəsində kənd təsərrüfatına dəyən ilkin ziyanın 135 milyon zlotı (31,4 milyon avro) olduğunu açıqlayıb. Xüsusilə taxıl toxumları əkini də ciddi zərər görüb, bu da gələcək illərdə məhsuldarlığa mənfi təsir göstərə bilər.

Polşa hökuməti zərər çəkmiş fermerlərə yardım edəcəyini bəyan edib. Dövlət dəstəyi çərçivəsində fermerlərə hər hektar yığılmamış məhsul üçün təxminən 5 000 zlotı (1 200 avro) kompensasiya ödəniləcək. Bundan əlavə, kənd təsərrüfatı torpaqları üçün icarə haqlarının ləğvi və daşqın sularının təsirinə məruz qalmış əkinlərə görə kompensasiya tədbirləri də həyata keçiriləcək.

Polşanın Kənd Təsərrüfatı nazirinin müavini Adam Novakın açıqlamalarına görə, ARMA (Kənd Təsərrüfatının Yenidənqurulması və Modernləşdirilməsi Agentliyi) məlumatlarına əsasən, daşqınlar nəticəsində 4 318 fermer zərər çəkib. Həmin fermerlərdən 3 360-ı məhsulun ən azı 30%-ni itirdiyini bildirib. Nazirlik, eyni zamanda, kənd təsərrüfatı torpaqlarının rekultivasiyası və əhənglənməsi kimi tədbirləri də nəzərdə tutan uzunmüddətli proqramlar üzərində çalışır.

Bu fəlakət, Polşada kənd təsərrüfatı sektorunun nə qədər həssas olduğunu və təbii fəlakətlərə qarşı daha yaxşı mühafizə mexanizmlərinin yaradılmasına ehtiyac olduğunu bir daha göstərir. Polşa hökumətinin göstərdiyi maliyyə dəstəyi, fermerlərin itkilərini müəyyən dərəcədə azaltmağa kömək etsə də, iqlim dəyişiklikləri ilə əlaqədar olaraq bu cür risklərin davamlı olaraq artması fermerlərə və kənd təsərrüfatı sektoruna uzunmüddətli təsirlər edəcəkdir.