Son vaxtlar ölkədə quşçuluq təsərrüfatlarına maraq xeyli artıb. Bunlardan biri də bildirçin təsərrüfatıdır. Cənub bölgəsində bu sahə ilə məşğul olan iri quşçuluq müəssisələri olmasa da, bəzi fermerlər kiçik təsərrüfatlarda bildirçin bəsləyirlər.

Gəlirli sahə olduğu üçün bölgədə bildirçin bəslənilən kiçik təsərrüfatların sayı artıb. Lənkəranlı fermer Rauf Mahmudov da belə təsərrüfat sahiblərindən biridir. Onun təsərrüfatında hazırda 100-dən çox bildirçin var: “Hər beş gündən bir bildirçin yumurtasını inkubator aparatına yığırıq. 14-15 günə aparatdan 200-300 bildirçin balası çıxır. Qırx beş günə yetişir, kəsilmək halına gəlir və 50-55 günə yumurtaya düşür. Əgər 100 baş bildirçin saxlasaq, gündə 90-95 yumurta almaq olur”.

Rauf Mahmudovun sözlərinə görə, bildirçin yumurtasının tərkibində olan müxtəlif maddələr - A, B1 və B2 vitamini toyuq yumurtasında olan vitaminlərdən daha çoxdur. Bununla yanaşı, bildirçin ətinin də insan üçün faydaları olduqca böyükdür. “Bildirçin yumurtasının faydası ürək-damar sistemi xəstəlikləri, böyrək daşlarının əriməsi üçün çox xeyirlidir. Kiçik uşaqlarda əqli qabiliyyəti artırmaq üçün istifadə edilir. Artıq insanlar bildirçin ətinin, yumurtasının faydalarından xəbərdardırlar. Keçənilkinə nisbətən bu məhsullarla maraqlananlar daha çoxdur”, - deyə Rauf Məmmədov qeyd edib.

Diri çəkisi təxminən 200 qram olan bildirçin alıcılara 2 manata, yumurtası isə 15-20 qəpiyə təklif olunur. Bildirçinin qidalanmasına gəlincə, əsasən təbii, minerallarla zəngin qidalardan istifadə edilir.

İşçi Zəminə Şabanova bildirib ki, bildirçinlərə qidalı yem verirlər: “Şüyüd, keşniş, cəfəri istifadə edirik. Bildirçinin əti dadlı olur. Bu quşa tələbat çoxdur. Yerlərini vaxtı-vaxtında təmizləyirik ki, hər hansı xəstəliyə yoluxmasın”.

Bildirçinlər çöl quşları olduğu üçün bir çox xəstəliklərə davamlıdır. Ona görə də onların peyvənd edilməsinə ehtiyac qalmır. Amma bununla belə, baytar mütəxəssislər bütün quşçuluq təsərrüfatlarını daim nəzarətdə saxlayırlar.

Lənkəran Baytarlıq İdarəsinin rəisi Əzizağa İskəndərov deyib ki, mütəmadi olaraq baytarlıq idarəsi və Aqrar Xidmətlər Agentliyinin əməkdaşları tərəfindən quş qripi xəstəliyinə qarşı nümunələr götürülür və müayinə üçün Respublika Baytarlıq Laboratoriyasına göndərilir. Bu günədək aparılan analizlər nəticəsində quş qripi xəstəliyi aşkar olunmayıb.