SOSİUM

Azərbaycanda bu il payızın havası 20 gün ləngiyib
25 SENTYABR
162

Azərbaycanda bu il payızın havası 20 gün ləngiyib

2017-09-25 14:38:00

Azərbaycanda bu il sentyabr ayında havanın temperaturunun enməsi prosesi ləngiyib.

Bunu Azərbaycan Milli Elmlər Akademiyasının (AMEA) Coğrafiya İnstitutunun direktor müavini, coğrafiya üzrə fəlsəfə doktoru Məhərrəm Həsənov deyib.

Fins.az xəbər verir ki, hər il sentyabrda havanın temperaturunun aşağı düşməsi sentyabrın əvvəllərində baş verirdi: "Bu il isə bu proses təxminən 20 gün ləngidi. Havanın temperaturunun enməsi sentyabrın 20-dən sonra baş verdi".

M.Həsənov əlavə edib ki, bu il sentyabrın 20-dək olan dövrdə hər gün havanın orta temperaturu əvvəlki illərin sentyabr ayı üçün olan orta rəqəmlərə nisbətən 2-3 dərəcə yüksək qeydə alınıb.

Onun sözlərinə görə, ümumilikdə iqlim dəyişmələri ilə əlaqədar bu il sentyabr ayı iqlim normalarına nisibətən isti keçib.

Hazırkı havanın sentyabr üçün xarakterik olduğunu deyən M.Həsənov qeyd edib ki, sentyabrda cənub istiqamətindən gələn hava kütlələri üstünlük təşkil edib. Ona görə də cənub və cənub-şərq istiqamətli, yəni tropik hava kütlələrinin ərazidə müşahidə edilməsi daha uzunmüddətli olub:

“Bu səbəbdən havanın temperaturu normaya nisbətən 2-3 dərəcə yüksək qeydə alındı. Bütün bunlar iqlim dəyişmələrinin nəticəsidir. İndi isə şimal-qərb hava kütlələrinin daxil olması gözlənilir. Ona görə də bu hava sentyabr ayı üçün səciyyəvidir”.

Qeyd edək ki, sentyabrın 23-ü gündüzdən başlayaraq, ölkə ərazisində hava qeyri-sabit keçir. Sinoptiklərin verdiyi məlumata görə, sentyabrın 26-dək bəzi rayonlarda hava şəraitinin qeyri-sabit keçəcəyi, şimşək çaxacağı, arabir yağış yağacağı gözlənilir. Ayrı-ayrı yerlərdə intensiv olacağı, dolu düşəcəyi ehtimalı var. Qərb küləyi ayrı-ayrı yerlərdə arabir güclənəcək. Çaylarda sululuğun artacağı ehtimal olunur.

Ekologiya və Təbii Sərvətlər Nazirliyinin (ETSN) Hidrometeoroloji Proqnozlar Bürosunun baş hidroloqu Asif Verdiyev Trend-ə bildirmişdi ki, Azərbaycanda 2003-cü ildən sonra ilk dəfə olaraq, bu ilin sentyabr ayında uzun müddətli isti hava şəraiti müşahidə edilib. Sonuncu dəfə Bakıda 2003-cü ilin sentyabr ayının ilk ongünlüyündə uzun müddətli isti hava şəraiti müşahidə edilib: “Bu il isə sentyabrda daha uzun müddətli istilər müşahidə edilir. Yalnız sentyabrın 7-8-də qeyri-sabit hava şəraiti müşahidə edilib. Həmin günlər istisna olmaqla, qalan günlərdə hava isti keçib. Bundan əlavə, havada rütubətin miqdarının da 2003-cü ilə nisbətən normadan daha artıq olması istilik effektini həmin illə müqayisədə artırıb”.

©Trend

 

© Materiallardan istifadə edərkən hiperlinklə istinad olunmalıdır
+13°C
  • $ USD
    1.7001
  • € EUR
    2.0000
  • ₽ RUB
    0.0297