SOSİUM

Bir ceyranın ovuna 1 milyon manat təklif olunub – RAZILIQ VERİLMƏYİB
01 NOYABR
565

Bir ceyranın ovuna 1 milyon manat təklif olunub – RAZILIQ VERİLMƏYİB

2016-11-01 15:19:00

XX əsrin ikinci yarısından başlayaraq, ceyranların nəslinin kəsilməsi təhlükəsi yaransa da, son illərdə Azərbaycan hökumətinin təbiəti mühafizə təşkilatları ilə birgə həyata keçirdiyi təxirəsalınmaz tədbirlər nəticəsində ceyranların sayında nəzərə çarpacaq artım qeydə alınıb.

Bu barədə  Ekologiya və Təbii Sərvətlər Nazirliyinin (ETSN) mətbuat xidmətindən məlumat verilib.

Bildirilir ki, 1960-cı ildə aparılmış aviasayğı nəticəsində respublikada 131 baş ceyran qeydə alınıb. 2003-cü ildə Heydər Əliyevin sərəncamı ilə Şirvan Milli Parkının  yaradılmasından sonra qısa müddətdə ceyranların sayında ciddi artım qeydə alınıb və onların sayı 7 mini keçib. Heydər Əliyev Fondu, Ekologiya və Təbii Sərvətlər Nazirliyi, IDEA İctimai Birliyi və WWF-Ümumdünya Təbiəti Mühafizə Fondunun birgə səyləri nəticəsində bu növün hazırda Azərbaycanda, Cənubi Qafqazda olan bir sıra tarixi məskənlərinə qaytarılması məqsədilə “Ceyranların mühafizəsi, reintroduksiyasi və tarixi areallarının yenidən bərpası” layihəsi uğurla icra olunur. Son 6  il ərzində layihə çərçivəsində Şirvan Milli Parkı ərazisindən ümumilikdə 170 başa yaxın ceyran tutularaq Acınohur-Sarıca düzlərinə, Bozdağ silsiləsinə, Ağgöl və Qobustan yaylasına buraxılıb. 

Qeyd olunur ki, ceyran fərdləri 1989-cu ildə nəsli kəsilməkdə olan növ kimi Qırmızı Kitaba daxil edilib: “Bu o deməkdir ki, ceyranın ovlanması istər mühafizə olunan ərazilərdə (qoruqlarda, Milli Parklarda), istərsə də ümumi statuslu ərazilərdə cinayət sayılır və heç bir şərtlə onların ovlanmasına hətta 1 milyon manata da icazə, lisenziya verilmir. Əgər gələcəkdə ceyranlarla bağlı bütün layihələr uğurla başa çatarsa və onların sayı ərazilərin qidalandırma imkanlarını aşarsa, onda populyasiyanın sağlam qalması naminə say tənzimləyici tədbirlər görülə bilər”. 

© Materiallardan istifadə edərkən hiperlinklə istinad olunmalıdır
+12°C
  • $ USD
    1.7369
  • € EUR
    1.8625
  • ₽ RUB
    0.0272