SOSİUM

BVF nümayəndəsi İqtisad Universitetində görüş keçirib
01 İYUN
127

BVF nümayəndəsi İqtisad Universitetində görüş keçirib

2016-06-01 12:30:00

Mayın 31-də Beynəlxalq Valyuta Fondunun (BVF) Azərbaycan üzrə missiyasının rəhbəri Məhəmməd əl-Qorçi Azərbaycan Dövlət İqtisad Universitetində (UNEC) olub. Universitetdən fins.az-a verilən məlumata görə, UNEC rektoru, professor Ədalət Muradovla görüşdə yeni iqtisadi şəraitlə bağlı ölkəmizdə makroiqtisadi vəziyyət, eləcə də biznes və investisiya mühitinin yaxşılaşdırılması sahəsində həyata keçirilən islahatlar barədə müzakirələr aparılıb. 

Məhəmməd əl-Qorçi Azərbaycandakı son iqtisadi proseslər, aparılan struktur islahatları barədə danışıb. Missiya rəhbəri bildirib ki, ölkənin özəl və qeyri-neft sektorlarının inkişafını nəzərdə tutan yeni iqtisadi model Azərbaycanda iqtisadiyyatın şaxələnməsinə gətirib çıxaracaq: «Hökumət doğru olaraq hazırkı dövrdə özəl sektorun dəstəklənməsini prioritet istiqamət kimi müəyyənləşdirib». 

BVF-nun Azərbaycan üzrə missiyasının rəhbəri Məhəmməd əl-Qorçi tədiyyə balansı ilə bağlı müsbət trendin olmasını da vurğulayıb.

UNEC rektoru Ə.Muradov bildirib ki, Azərbaycan iqtisadiyyatında mövcud çağırışlar, ilk növbədə, neftin qiymətinin dəyişkənliyi ilə bağlıdır. Amma Azərbaycanda əvvəlki illərdə həyata keçirilən uğurlu siyasət bu çağırışlara layiqli cavab verməyə imkan verir. Belə ki, dövlət başçısı həyata keçirilən iqtisadi siyasətin və islahatların davamlılığını təmin etmək üçün iqtisadiyyatın mövcud vəziyyətinin dərin təhlili və yeni iqtisadi inkişaf strategiyasının hazırlanması məqsədi ilə “Milli iqtisadiyyat və iqtisadiyyatın əsas sektorları üzrə strateji yol xəritəsinin başlıca istiqamətləri” barədə sərəncam verib. 

Rektor Azərbaycanın Türkiyə və İranla iqtisadi əlaqələrini genişləndirdiyini, “İpək yolu” marşrutu üzrə müvafiq layihələr həyata keçirdiyini də diqqətə çatdırıb. Biznes və investisiya mühitinin yaxşılaşdırılmasından danışan Ə.Muradov, sahibkarlığın stimullaşdırılması məqsədilə bu sahədə yoxlamaların dayandırıldığını, lisenziyaların və icazələrin sayının kəskin azaldığını bildirib. Apellyasiya Şuralarının yaradıldığı, maliyyə bazarlarına nəzarətin gücləndirildiyi və investisiyaların təşviqi sahəsində bir sıra tədbirlərin həyata keçirildiyini söyləyib. 

Bankların fəaliyyətindən söz açan rektor bildirib ki, Mərkəzi Bankın əsas məqsədi öz səlahiyyətləri çərçivəsində qiymət sabitlliyini təmin etmək olsa da, bu qurum ÜDM-nin artımını təmin edə biləcək obyektlərdən biri olmalıdır.

© Materiallardan istifadə edərkən hiperlinklə istinad olunmalıdır
+12°C
  • $ USD
    1.7339
  • € EUR
    1.8516
  • ₽ RUB
    0.0272