KƏND TƏSƏRRÜFATI

Azərbaycanda yeni texnologiya ilə pambıq əkilir
05 APREL
153

Azərbaycanda yeni texnologiya ilə pambıq əkilir

2019-04-05 10:20:00

Kənd Təsərrüfatı Nazirliyi Aqrar Elm və İnnovasiya Mərkəzinin Bitki Mühafizə və Texniki Bitkilər Elmi-Tədqiqat İnstitutunun Ucar rayonunda yerləşən Şirvan Təcrübə Stansiyasında “Yeni texnologiya ilə əkiləcək pambıq sahəsinə mineral gübrələrin verilməsi və səpinqabağı becərmə işlərinin təşkili” mövzusunda tarla seminarı keçirilib. Tarla seminarına pambıqçılıqla məşğul olan 40 nəfər fermer və fiziki şəxs qatılıb.

Fins.az xəbər verir ki, seminarda innovativ Çin texnologiyası ilə pambıq əkiləcək sahəyə mineral gübrənin verilməsi, ağır diskli malanın çəkilməsi prosesi nümayiş etdirilib. Kənd təsərrüfatı nazirinin müşaviri Şöhrət Vəkilov, təhsil və təlim şöbəsinin müdiri İmran Cümşüdov, bitkiçiliyin təşkili və monitorinqi şöbəsinin müdiri Rafail Quliyev, habelə Çin Xalq Respublikasından gələn mütəxəssislər – Lin Xinan, Tu Qinan və Vung TianZuo yeni texnologiyanın üstünlükləri barədə danışıblar. Bölgədə pambıq əkən fermerlərə və fiziki şəxslərə yeni texnologiyanın üstünlükləri haqqında ətraflı məlumat verilib. Bildirilib ki, ayrılan torpaq sahəsində ötən ilin payızında dönər kotanla şumlama aparılıb, fevral ayından başlayaraq sahə lazer mala ilə hamarlanıb, dərin yumşaldıcı ilə 70 santimetrə qədər reperləmə əməliyyatı aparılıb.

Sahələrin lazer mala ilə hamarlanması və reperləmə əməliyyatları martın 13-də Ucar və ətraf rayonlarda pambıqçılıqla məşğul olan fermerlərə nümayiş olunub. Qeyd olunub ki, Prezident İlham Əliyevin tapşırığı ilə bu gün aqrar sektorda innovativ becərmə texnologiyaların tətbiqi diqqət mərkəzindədir. Bu texnologiya, əlbəttə, yüksək məhsuldarlıq üçün zəruridir. Vurğulanıb ki, bu gün burada - 10 hektar sahədə Çin texnologiyası əsasında pambıq əkininə hazırlıq işləri görülür. Ənənəvi əkin və becərmə üsullarından fərqli olaraq sahə lazer mala ilə hazırlanıb və 70 sanimetrə qədər yumşaldılıb. Damcılı suvarma sistemi qurulacaq, cərgəarası 90 santimetr olmaqla, iki sırada əkin aparılacaq ki, hər hektarda 200-220 min bitki olacaq. İndiyədək ənənəvi üsulla aparılan əkində isə 100-110 min bitki olur. Yeni texnologiya ilə fermer hər hektardan 50-60 sentner məhsul götürə biləcək. Halbuki indiyədək bu rəqəm 16-17 sentner olub. Tarla seminarında əkin sahəsinə hər hektara 260 kiloqram hesabı ilə şumaltı gübrə - nitroammofosk verilib. Mineral gübrənin əhəmiyyəti barədə geniş məlumat verilərək vurğulanıb ki, nitroammofosk torpağın kimyəvi-fiziki xüsusiyyətlərinin yaxşılaşmasına, çıxışdan sonra bitkilərdə güclü kök sisteminin yaranmasına və normal inkişafına münbit şərait yaradır. Gübrənin sahəyə verilməsindən sonra ağır diskli mala ilə səpinqabağı becərmə işləri yerinə yetirilib. Tarla seminarında yeni texnologiyanın üstünlükləri əyani nümayiş etdirilib, fermerlərin çoxsaylı sualları mövcud təcrübə əsasında əhatəli cavablandırılıb.

© Materiallardan istifadə edərkən hiperlinklə istinad olunmalıdır
  • $ USD
    1.7
  • € EUR
    1.9396
  • ₽ RUB
    0.0272