NƏQLİYYAT

Binəqədi rayonunda bir neçə küçədə aparılan təmir işləri yekunlaşdırılıb
23 FEVRAL
342

Binəqədi rayonunda bir neçə küçədə aparılan təmir işləri yekunlaşdırılıb

2018-02-23 18:28:00

Binəqədi rayonunda Azərbaycan Avtomobil Yolları Dövlət Agentliyi tərəfindən bir neçə küçədə aparılan kompleks yenidənqurma işləri yekunlaşdırılıb.

Agentliyin ictimaiyyətlə əlaqələr şöbəsindən bildirilib ki, söhbət bir-biri ilə kəsişən Məsud Davudoğlu, Şota Rustavelli, Svetlana Məmmədova və İsmayıl Dağıstanlı küçələrindən gedir. Artıq vətəndaşlar yenidənqurmadan sonra genişləndirilmiş və müasir yol elementləri ilə təchiz edilmiş küçələrdən rahat şəkildə istifadə edirlər.

Sözügedən küçələrin yenidən qurulması zamanı vacib olan məqam ondan ibarətdir ki, küçələrdə təmir işləri yeraltı kommunikasiya xətlərinin çəkilişi ilə məşğul olan qurumlarla birgə aparılıb. Belə ki, mövcud kommunikasiya xətləri (su, kanalizasiya, qaz, rabitə, elektrik) bərpa olunub və ya yeniləri çəkilib, zəruri olan yerlərdə yolun hərəkət hissəsindən kənara çıxarılıb. Təbii ki, aidiyyəti qurumlarla birgə aparılan işlər gələcəkdə yolun asfalt-beton örtüyünün tez bir zamanda sıradan çıxmasını sığortalamış olacaq. Həmçinin aparılan təmir işləri zamanı mövcud yağış-kanalizasiya sistemi bərpa olunaraq işlək vəziyyətə salınıb.

Yenidən qurulan Məsud Davudoğlu küçəsinin uzunluğu 945 metrdir. Burda aparılan yenidənqurma işləri zamanı küçənin eni 7-8 metrdən ortalama 12 metrə çatdırılıb. Bu isə öz növbəsində küçə boyu hərəkətin daha rahat təşkil olunması deməkdir. Bundan başqa, zəruri olan yerlərdə yol yatağının yararsız qruntu qazılaraq çıxarılıb, əvəzinə yararlı material tökülərək kipləşdirmə işləri aparılıb.

Vətəndaşların rahat və təhlükəsiz hərəkəti üçün yeni piyada səkiləri tikilib, mövcudları isə bərpa olunub. Yol boyu piyada səkilərinin kənarlarına 1500 poqonmetr uzunluğunda yeni səki daşları düzülüb. Sərnişin avtobuslarının ümumi hərəkətə maneə yaratmadan dayanacaqlara giriş-çıxışını təmin etmək məqsədilə 2 yerdə “cib”li dayanacaq hissələr yaradılıb, 15 ədəd yeni yağış barmaqlıqları, kommunikasiya xətləri üçün isə 96 ədəd yeni baxış qapaqları qoyulub. Küçəyə 2 qat olmaqla yeni asfalt-beton örtük döşənib.

Anoloji işlər 590 metr uzunluğa malik Şota Rustaveli küçəsində də aparılıb. Burda küçənin eni 8,5 metr təşkil edir. Mövcud yağış-kanalizasiya sistemi bərpa olunduqdan sonra zəruri olan yerlərdə səth sularının kənarlaşdırılması üçün 3 ədəd yağış barmaqlıqları qoyulub, kommunikasiya xətlərinin dəmir-beton plitələri qaldırılaraq 25 ədəd yeni baxış qapaqları qoyulub.

Əsaslı şəkildə təmir olunan daha iki küçə İsmayıl Dağıstanlı küçəsinin 220 metrlik və Svetlana Məmmədova küçəsinin 190 metrlik hissələridir.

İsmayıl Dağıstanlı küçəsinin sözügedən hissəsinin eni 5 metrdən 7,5 metrə qədər genişləndirilib. Svetlana Məmmədova küçəsinin təmir işləri aparılan hissəsinin eni isə 6 metr təşkil edir.

Küçələr boyu yeni səki daşları düzülüb, yağış-kanalizasiya sistemi bərpa olunaraq işlək vəziyyətə salınıb, yeni yağış barmaqlıqları və baxış qapaqları qoyulub, asfalt-beton örtük tam olaraq yenilənib. Yenidən qurulan hər 4 küçəyə 2 qat olmaqla yeni-asfalt beton örtük döşənib. Küçələr boyu asfaltlanmış sahə 20 min kvadratmetrə yaxındır.

Qeyd edək ki, bütün işlər tərtib olunmuş qrafikə uyğun, tikinti norma və standartlar əsasında yüksək keyfiyyətlə aparılıb.

© Materiallardan istifadə edərkən hiperlinklə istinad olunmalıdır
  • $ USD
    1.7000
  • € EUR
    1.9906
  • ₽ RUB
    0.0276