ƏMLAK

Mağaza cəmi 450 manata satıldı -HƏRRAC
10 İYUL
591

Mağaza cəmi 450 manata satıldı -HƏRRAC

2018-07-10 15:21:00

Əmlak Məsələləri Dövlət Komitəsi (ƏMDK) növbəti özəlləşdirmə hərracına yekun vurub. Komitədən Fins.az-a verilən məlumata görə, hərracda ümumilikdə 15 dövlət əmlakına 22 sifariş verilib. Qeyd edək ki, budəfəki hərracda nəqliyyat vasitələri üzrə 5 sifariş elektron formada verilib, 2 sifarişçi isə hərrac keçirilən yerə gəlmədən, olduğu məkanda hərracda onlayn formada iştirak edib.

Hərracda satılan əmlaklar həm əlverişli yerləşməsi, həm də qiyməti ilə diqqəti cəlb edir. Sifarişçi ümumi faydalı sahəsi  26.7 kv.m  olan Sumqayıt şəhərində yerləşən qeyri-yaşayış sahəsi üçün 6 min manat ödəməklə əmlakın sahibinə çevrildi. Xidmət sahələrində fayda verə biləcək digər qeyri-yaşayış sahələrindən 2-si paytaxtda, digərləri isə Gədəbəy, Mingəçevir, Sumqayıt şəhərlərində yerləşir. Cəmi 450 manat ödəməklə sifarişçini əmlak sahibinə çevirən Siyəzən şəhərində yerləşən 43 saylı mağazanın ümumi faydalı sahəsi isə 20.1 kv.m-dir.

Hərracda avtomobillərin satışında böyük rəqabıt müşahidə edilib. Buraxılış ili 2003 olan «Qaz 3110-101» markalı avtomobil üçün ilkin qiymət 1300 manat təyin olunsa da sifarişçilər arasında rəqabətli mübarizə nəticəsində nəqliyyat vasitəsinə ən son təklif 3 min 200 manat oldu.

Rəqabətli proses yaradan bu dövlət əmlakına 2-si elektron olmaqla 5 sifariş verilmiş və sifarişçilərdən biri hərracda onlayn formada iştirak etmişdir. «Opel Omeqa» markalı avtomobilin hərracında ilkin qiymət 750 manat müəyyən olunub. İki sifarişçinin avtomobilə sahib olma istəyi qiyməti 2 dəfədən çox artırıb 1900 manata yüksəltdi.

Avtomobillərin satışında rəqabət bir nəfərin onlayn formada iştirak etdiyi Kamaz-55111 markalı avtomobilin hərracı üçün də xarakterikdir. İlkin qiyməti 2 min 600 manat olan dövlət əmlakı 3 min 550 manat ödənilməklə  özəlləşdirildi.

Növbəti özəlləşdirmə hərracı 17 iyulda keçiriləcək. Hərraca ayrı-ayrı iqtisadi sahələrə aid 157 dövlət obyekti çıxarılıb. Özəlləşdirilməsi nəzərdə tutulan dövlət əmlaklarından 19-u səhmdar cəmiyyəti, 54-ü kiçik dövlət müəssisə və obyekti, 70-i qeyri-yaşayış sahələridir.

Özəlləşdirmə hərracına qatılmaq üçün Özəlləşdirmə portalı üzərindən əmlakı seçib sifariş vermək kifayət edir. Portalda hər bir əmlak haqqında məlumat, onun xəritədəki yeri və mövcud vəziyyəti barədə fotoşəkillər var. İstənilən şəxs hərraca həm iştirakçı qismində qatıla, həm də ziyarətçi olaraq canlı izləyə bilər.

© Materiallardan istifadə edərkən hiperlinklə istinad olunmalıdır
  • $ USD
    1.7000
  • € EUR
    1.9117
  • ₽ RUB
    0.0251