ƏMLAK

Region sakinlərinə “kütləvi çıxarış”lar verilib – AÇIQLAMA
04 NOYABR
257

Region sakinlərinə “kütləvi çıxarış”lar verilib – AÇIQLAMA

2016-11-04 15:57:00

“Kütləvi çıxarış” kampaniyasında daha bir yenilik edilib. Əmlak Məsələləri Dövlət Komitəsindən fins.az-a verilən xəbərə görə, artıq kampaniyanın bir gündə bir neçə şəhər və ya rayonda keçirilməsinə başlanıb.

Bu gün noyabrın 4-də paralel olaraq həm Gəncə şəhərində, həm də Göygöl rayonunda “Kütləvi çıxarış” kampaniyası keçirilib. Bir gündə ümumilikdə 220-ə yaxın vətəndaşa daşınmaz əmlakın qeydiyyatı ilə bağlı xidmətlər göstərilib.

Belə çıxarışlar həyət evləri, torpaq sahələri, mənzillər, pay torpaqları və həyətyanı sahələrə dair verilir. Eyni zamanda, əmlaklara dair ilkin mülkiyyət sənədləri qəbul edilir. Kampaniyaların gedişində vətəndaşlara hüquqi yardımlar göstərilir.

Qeydiyyatla bağlı tələb olunan sənədlərin hansı qurumlardan alınması ilə bağlı istiqamət verilir. Bütün bu sosial addımlarda məqsəd xidmətlərdə əlçatanlığı təmin etmək və vətəndaş məmnunluğunun artırılmasına nail olmaqdır.

Gəncədə baş tutan kampaniya çərçivəsində daha çox fərdi evlər, onların torpaq sahələri və mənzillər sənədləşdirilib. 50-yə yaxın sakinə hazır çıxarış paylanıb, 30-a yaxın vətəndaşdan əvvəlki illərdə verilmiş aktlar, şəhadətnamələr, qeydiyyat vəsiqələri və digər mülkiyyət sənədləri qəbul edilib.

Həmin gün Göygöldə keçirilən kampaniya zamanı isə rayonun 30-yə yaxın sakini öz həyətyanı torpaq sahəsi, pay torpağı, vaxtilə kolxoz və ya sovxozlar tərəfindən ayrılmış torpağa və öz torpağında tikdiyi həyət evinə dair çıxarış əldə edib. 20-yə yaxın vətəndaş növbəti mərhələdə çıxarışla əvəz olunması üçün ilkin mülkiyyət sənədlərini də komitənin nümayəndələrinə təqdim edib.

Paralel olaraq kampaniya çərçivəsində Gəncə və Göygölün çoxsaylı sakininə və əmlakının qeydiyyatı ilə maraqlananlara mobil hüquqi yardımlar göstərilib. Gəncədə 40-a yaxın, Göygöldə isə 30-a yaxın vətəndaş bu xidmətdən faydalanıb. Bu zaman əmlak sahiblərinə əmlaklarının qeydiyyatının vacibliyi, qeydiyyata alınan əmlakın üstünlükləri izah edilib, əmlakın qeydiyyatı üçün prosedurlar, tələb olunan sənədlər barədə məlumat verilib. Mobil hüquqi yardım çərçivəsində qeydiyyat üçün tələb olunan sənədlərin necə və hansı orqanlardan toplanması, ortaya çıxan çətinliklərin həlli ilə bağlı geniş bilgilər verilib.

Kampaniya çərçivəsində Komitənin mobil ofisləri vasitəsilə bir sıra vətəndaşa texniki pasportların hazırlanması ilə bağlı çöl-ölçmə və digər texniki xidmətlər də göstərilib.

Qeyd edək ki, kampaniyadan əlavə, mobil ofis xidmətləri çərçivəsində vətəndaşlara ünvanlarda gündəlik qeydiyyat xidmətləri də göstərilir.

Xatırladaq ki, hazırda torpaq və evlərin sənədləşdirilməsi “bir pəncərə” prinsipi əsasında həll olunur. Vətəndaş bütün qeydiyyat prosedurunu yalnız bir qurumda – Daşınmaz Əmlakın Dövlət Reyestri Xidmətində həyata keçirir, əlavə qurumlara müraciətlərə ehtiyac qalmır. Bu tədbirlər isə məmur-vətəndaş ünsiyyətini azaltmaqla son nəticədə xidmətlərdə şəffaflığın, operativliyin və məmnunluğun artmasını təmin edir.

© Materiallardan istifadə edərkən hiperlinklə istinad olunmalıdır
+12°C
  • $ USD
    1.7339
  • € EUR
    1.8297
  • ₽ RUB
    0.0270