DÜNYA

Səhiyyə Nazirliyi siqaret satışını qadağan etmək istəyir
26 DEKABR 2018
338

Səhiyyə Nazirliyi siqaret satışını qadağan etmək istəyir

2018-12-26 14:34:00

Rusiya Səhiyyə Nazirliyi 2019-cu ildən 2030-cu ilədək tütün məmulatlarının istehlakına qarşı dövlət siyasəti konsepsiyası layihəsi hazırlayıb.

Fins.az-ın Trend-ə istinadən məlumatına görə, sənədə əsasən, əsas məqsəd 2050-ci ilədək tütün məmulatlarından istifadəni tədricən azaltmaqdır. Nazirlik, həmçinin tütün məhsullarının mərhələli şəkildə dövriyyədən çıxarılması variantına baxır.

Qurumdan bildiriblər ki, Rusiya əhalisinin təqribən 1/3-i – 40 milyondan çox insan siqaret çəkir. Qiymətləndirməyə əsasən, 2040-2050-ci ilədək bu zərərli vərdişə mübtəla olan vətəndaşların sayı 5 faizə qədər azaldılmalıdır ki, bu da tütün məmulatlarının satışını dayandırmağa imkan verəcək.

Nazirlik hesab edir ki, siqaret satışından büdcəyə daxilolmalar tütün istehlakından yaranan xəstəliklərin qarşısının alınmasına sərf olunan vəsaitdən xeyli azdır. Həmçinin qeyd olunur ki, siqaret çəkməyən vətəndaşlarda əmək qabiliyyəti və ömür uzunluğu artır, xəstəlik müddəti isə azalır.

Qeyd edək ki, Rusiyada stadion, məktəb, xəstəxana, mağaza, uşaq meydançaları, eləcə də təyyarələrdə tütün məmulatlarını reklam etmək, mehmanxana, kafe və restoranlar, qatarlar, vağzal və hava limanlarında isə siqaret çəkmək qadağandır.

Bir müddət əvvəl Rusiya səhiyyə nazirinin müavini Oleq Salaqay bildirmişdi ki, ölkədə ölüm hallarının 17 faizinin səbəbi siqaret çəkməkdir.

© Materiallardan istifadə edərkən hiperlinklə istinad olunmalıdır
  • $ USD
    1.7
  • € EUR
    1.9143
  • ₽ RUB
    0.0267