DÜNYA

OPEC və qeyri-OPEC ölkələri Vyanada toplaşır
09 AVQUST
229

OPEC və qeyri-OPEC ölkələri Vyanada toplaşır

2017-08-09 16:25:00

Neft İxrac Edən Ölkələr Təşkilatına (OPEC) üzv və kartelə üzv olmayan ölkələrin nümayəndələrinin avqustun 21-də Avstriyanın paytaxtı Vyanada görüşü planlaşdırılır. Bu barədə OPEC-dən bildirilib.

OPEC üzv və kartelə üzv olmayan bəzi ölkələrin nümayəndələri avqustun 7-8-də Birləşmiş Ərəb Əmirliklərinin (BƏƏ) paytaxtı Abu-Dabidə neft hasilatının azaldılması üzrə sazişi nəzərdən keçiriblər.

OPEC+ ölkələrin nümayəndələri bu il yanvarın 1-dən qüvvədə olan neft hasilatının azaldılması sazişi üzrə öhdəliyə əməl edilmə faizini artırmağın yollarını müzakirə ediblər.

Toplantıda Səudiyyə Ərəbistanı, Rusiya, Küveyt və BƏƏ ilə yanaşı, İraq, Qazaxıstan və Malayziyadan olan nümayəndələr iştirak edib. Görüşdə İraq, Birləşmiş Ərəb Əmirlikləri Qazaxıstan və Malayziya neft hasilatının azaldılması üzrə öz öhdəliklərini təsdiqləyiblər. OPEC və qeyri-OPEC ölkələr üzrə Texniki Komitə və Nazirlərin Monitorinq Komitəsi bu ölkələrdə mövcud monitorinq mexanizminin işləməsi və onların öhdəliyə tam sadiqliyini təmin etmək məqsədilə birgə əməkdaşlıq edəcək.

Qeyd edək ki, ötən il noyabrın 30-da OPEC üzrə gündəlik neft hasilatının 1,2 milyon barrel azaldılaraq 32,5 milyon barrelə endirilməsi barədə razılıq əldə olunub. Dekabrın 10-da isə Vyanada OPEC üzvləri ilə təşkilata daxil olmayan 11 ölkə, o cümlədən Azərbaycan ümumi hasilatın sutkada 558 min barrel azaldılması barədə sazişə imza atıb.

Neft hasilatının azaldılması üzrə sazişə müvafiq olaraq Azərbaycan iyulda hasilatı sutkada 35 min barrel azaltmaqla bağlı götürdüyü öhdəliyi tam yerinə yetirib.

Ölkə üzrə gündəlik neft hasilatı yanvar ayı ərzində 793,9 min barrel, fevralda 776,4 min barrel, martda 733,3 min barrel, apreldə 781,1 min barrel, mayda 785,3 min barrel, iyunda isə 793,7 min barrel olub. Mayın 25-də OPEC Nazirlər Şurasının 172-ci iclası çərçivəsində OPEC-ə üzv və qeyri-üzv dövlətlər arasında neft hasilatının azaldılmasına dair sazişin müddətinin 2018-ci ilin birinci rübünün sonunadək uzadılması barədə razılıq əldə olunub.

© Azərtac

© Materiallardan istifadə edərkən hiperlinklə istinad olunmalıdır
+18°C
  • $ USD
    1.7001
  • € EUR
    2.0087
  • ₽ RUB
    0.0296