BÜDCƏ

Sentyabrda iqtisadi gündəm qızacaq
02 SENTYABR
123

Sentyabrda iqtisadi gündəm qızacaq

2019-09-02 10:14:00

Sentyabr ayında ölkə xaricində və daxilində mühüm məlumatlar açıqlanacaq.

Fins.az Marja-ya istinadən xəbər verir ki, bazarların istiqaməti üzərində mərkəzi bankların faiz qərarları həlledici olacaq. Sentyabr ayında Avropa Mərkəzi Bankı (ECB) və ABŞ Mərkəzi Bankı (Fed) faiz qərarlarını açıqlayacaqlar.

Faiz qərarını ECB 12 Sentyabrda, Fed isə18 Sentyabrda açıqlayacaqdır. Fed-in bu il ikinci dəfə faiz endirimi edəcəyi gözlənilir. Trampın təzyiqinə görə, faiz endiriminin kəskin olub-olmayacağı bazarların diqqətindədir. Ticarət müharibələri ilə səngiyən qlobal iqtisadi artım, inflyasiyanın zəif qalması və Brexit qeyri-müəyyənliyi Fed-i faiz endirməyə məcbur edir. 

ECB-nin faiz qərarı, monetar genişlənmə və Avropa iqtisadiyyatının ümumi gedişinə dair verəcəyi açıqlamalar bazarların gündəmində yer alacaq.

12 Sentyabrda Türkiyə Mərkəzi Bankının da İdarə Heyəti toplaşacaq. Türkiyə Mərkəzi Bankı iyul ayı toplantısında faizi 425 bənd aşağı salaraq 24%-dən 19,75%-ə endirmişdi.

Sentyabrda ABŞ - Çin arasında davam edən ticarət danışıqları, Brexit qeyri-müəyyənliyi bazarlarda yaxından təqib ediləcəkdir. 

Ölkə daxilində, Azərbaycan Mərkəzi Bankı 13 Sentyabrda faiz qərarını ictimaiyyətə açıqlayacaqdır.

İyulda Azərbaycan Respublikası Mərkəzi Bankının İdarə Heyəti uçot dərəcəsinin 8.50%-dən 8.25%-ə endirilməsi haqda qərar qəbul etmişdir. Faiz dəhlizinin yuxarı həddi 10.25%, aşağı həddi isə 6.25% (uçot dərəcəsinə ±2%-lik simmetrik diapazonda) səviyyəsində müəyyən edilmişdir. Azərbaycan Mərkəzi Bankı 2019-cu ildə 5 dəfə faiz endirib.

2017-ci ildə Azərbaycan Mərkəzi Bankının uçot dərəcəsi 15% səviyyəsində idi. 2018-ci ilin Fevral ayında uçot dərəcəsi 13%-ə, Aprel ayında 11%-ə, İyul ayında 10%-ə, Oktyabr ayında 9,75%-ə endirildi. Uçot dərəcəsi 2019-cu ilin  Fevral ayında 9,25%-ə, Mart ayında 9%-ə, Aprel ayında 8,75%-ə, İyun ayında 8,5%-ə, İyul ayında isə 8,25%-ə endirilib.

Ddünya liderlərinin iştirak edəcəyi İqlim Zirvəsi, Böyük Britaniya parlamentinin yay tətilindən qayıdaraq 9 Sentyabrda yenidən tətilə çıxması və Avstriyadakı erkən ümumi seçkilər sentyabrda dünya gündəmində qarşıya çıxan əsas başlıqları arasında yer alır.

© Materiallardan istifadə edərkən hiperlinklə istinad olunmalıdır