BÜDCƏ

ARDNF gəlir və xərclərinin dəyişməsini şərtləndirən amilləri açıqlayıb
05 OKTYABR
133

ARDNF gəlir və xərclərinin dəyişməsini şərtləndirən amilləri açıqlayıb

2017-10-05 16:34:00

Azərbaycan Respublikasının Dövlət Neft Fondunun (ARDNF) gəlir və xərclərinin dəyişməsində bir neçə amilin rolu var. Fins.az xəbər verir ki, bu barədə APA-nın sorğusuna cavab olaraq ARDNF-nin İctimaiyyətlə əlaqələr sektorundan bildirilib.

"Birinci amil onunla bağlıdır ki, "Azərbaycan Respublikasının 2017-ci il üçün dövlət büdcəsi haqqında Azərbaycan Respublikasının qanununda dəyişikliklər edilməsi barədə"  30 iyun 2017-ci il tarixli qanunla dövlət və icmal büdcə xərclərində dürüstləşdirmə aparıldığını nəzərə alaraq, icmal büdcənin tərkib hissəsi olan ARDNF-nin gəlir və xərclərində də dürüstləşdirmənin aparılması zərurəti yaranıb.

Eyni zamanda, prezident İlham Əliyevin "SOCAR Türkiyə Ege" Neft Emalı Zavodu (STAR) layihəsində Azərbaycan tərəfinin iştirakının dəstəklənməsi məqsədilə əlavə tədbirlər haqqında sərəncamının icrasına uyğun olaraq STAR layihəsində dövlətimizin iştirak payı artırılıb ki, bu fərmanın icrasını təmin etmək məqsədilə ARDNF-nin 2017-ci il büdcəsində Türkiyədə STAR neft emalı kompleksinin tikintisi layihəsində Azərbaycanın iştirak payının maliyyələşdirilməsi ilə bağlı 744,072 mln. manat məbləğində xərc maddəsi əlavə edilib.

Digər tərəfdən, ARDNF-nin vəsaiti hesabına həyata keçirilən qaçqınların və məcburi köçkünlərin sosial həyat şəraitinin yaxşılaşdırılması ilə bağlı bəzi tədbirlərin vaxtında başa çatdırılmasını təmin etmək məqsədilə Fondun büdcəsinin müvafiq xərc maddəsi 90 mln. min manatdan 105 mln. manata qədər artırılıb", - deyə məlumatda vurğulanıb.

Xatırladaq ki, prezidentin 4 oktyabr 2017-ci il tarixli fərmanı ilə ARDNF-nin 2017-ci il büdcəsinə dəyişikliklər edilib.

Fərmana uyğun olaraq 2017-ci il büdcə gəlirlərini və xərclərini dəqiqləşdirmək məqsədilə ARDNF-nin 2017-ci il büdcəsində Azərbaycanın payına düşən karbohidrogenlərin satışından əldə edilən xalis gəlirlər 7 mlrd. 550 mln. 705,3 min manatdan 9 mlrd. 826,212 mln. manata qədər, karbohidrogen ehtiyatlarının işlənməsi ilə əlaqədar sərmayəçilər tərəfindən müqavilə sahəsindən istifadə üçün ödənilən akrhesabı ödənişlər                   3,465 mln. manatdan 3 mln. 605,5 min manata, neftin və qazın Azərbaycan ərazisi ilə ötürülməsindən əldə edilən gəlirlər 16,830 mln. manatdan 17 mln. 688,5 min manata, valyuta aktivlərinin yerləşdirilməsindən və idarə olunmasından əldə edilən gəlirlər 799 mln. 94,6 min manatdan 963,948 mln. manata, neft-qaz sazişlərinin imzalanması və icrası ilə bağlı sərmayəçilər tərəfindən ödənilən bonus gəlirləri 495 min manatdan 2 mln. 407,6 min manata qədər və Fondun 2017-ci il üzrə büdcə gəlirlərinin ümumi həcmi 8 mlrd. 370 mln. 589,9 min manatdan 10 mlrd. 813 mln. 861,6 min manata qədər artırılıb.

Neft Fondunun 2017-ci il üçün büdcə xərclərinin ümumi həcmi 14 mlrd. 483,856 mln. manatdan 15 mlrd. 242,928 mln. manata qədər artırılıb.

Fərmana əsasən Azərbaycanın 2017-ci il dövlət büdcəsində qaçqınların və məcburi köçkünlərin sosial-məişət və məskunlaşma məsələləri ilə bağlı bəzi tədbirlərin maliyyələşdirilməsi ilə bağlı xərc maddəsi 90 mln. manatdan 105 mln. manata qədər artırılıb və Fondun 2017-ci il büdcəsinə STAR neft emalı kompleksinin tikintisi layihəsində Azərbaycanın iştirak payının maliyyələşdirilməsi ilə bağlı 744,072 mln. manat məbləğində xərc maddəsi əlavə edilib.

© Materiallardan istifadə edərkən hiperlinklə istinad olunmalıdır
+14°C
  • $ USD
    1.7001
  • € EUR
    2.0087
  • ₽ RUB
    0.0296