BÜDCƏ

Hökumət, əhali və biznes qənaətə keçib - HESABAT
16 İYUN
291

Hökumət, əhali və biznes qənaətə keçib - HESABAT

2016-06-16 15:01:00

Mərkəzi Bank 2016-cı ilin 1-ci rübü üzrə tədiyyə balansı ilə bağlı məlumatları açıqlayıb. Fins.az-ın məlumatına görə, ilk rüb ərzində cari hesablar balansında son 10 ildə qeydə alınmayan ən böyük məbləğdə - 432,1 milyon dollar məbləğində defisit qeydə alınıb. Qeyd edək ki, 2015-ci ilin ilk rübündə cari hesablar balansında 57,8 milyon dollar, 2014-cü ilin yanvar-mart aylarında isə 3,3 milyard dollar profisit olmuşdu.

İqtisadçı ekspert Rövşən Ağayevin sözlərinə görə, tədiyyə balansının təhlili göstərir ki, hamı - istər ev təsərrüfatları, istərsə də biznes və hökumət sektoru qənaət rejiminə keçib.

Ev təsərrüfatlarının qənaəti özünü xaricdə turizmə xərclənən vəsaitlərin həcmində göstərir. Bu ilin 3 ayında xarici turizm xidmətlərinə 530 milyon dollar xərclənib - halbuki 2014-cü ilin eyni döründə bu məbləğ 814 milyon dollar, 2015-ci ildə 626 milyon dollar olmuşdu.

Biznes və hökumət sektorunun qənaət rejiminə keçməsi özünü xarici ölkələr tərəfindən göstərilən müxtəlif işgüzar xidmətlərə görə ödənişlərin kəskin azalmasında göstərir. 2016-cı ildə həmin xidmətlərə 200 milyon dollar xərclənib - amma 2014-də 635 milyon dollar, 2015-də 331 milyon dollar xərclənmişdi.

Xaricdə yaşayan şəxslərin ailələrinə göndərdiyi pullar (remitanslar) da xeyli azalıb. Bu ilin ilk 3 ayında bu xətlə ölkəyə 179 milyon dollar daxil olub - əvvəlki 2 ildə həmin məbləğ 310-360 milyon dollar intervalında olmuşdu.

Neftin qiymətinin azalması Azərbaycan hökuməti ilə yanaşı xarici neft şirkətlərinin də mənfəətinin kəskin azalmasına səbəb olub. Belə ki, 2016-cı ilin 3 ayında beynəlxalq neft-qaz konsorsiumları üzrə xarici investorların payına düşən gəlirlərin ölkədən çıxarılan həcmi (repatriasiyası) 313 milyon dollar olub - halbuki 2014-cü ildə bu rəqəm 815 milyon dollar olmuşdu.

© Materiallardan istifadə edərkən hiperlinklə istinad olunmalıdır
+12°C
  • $ USD
    1.7339
  • € EUR
    1.8516
  • ₽ RUB
    0.0272