BİZNES

25 ölkədən 150 nümayəndənin iştirakı ilə konfrans keçiriləcək - Bakıda
26 APREL
163

25 ölkədən 150 nümayəndənin iştirakı ilə konfrans keçiriləcək - Bakıda

2018-04-26 13:00:00

Bu il mayın 2-4-də Bakı şəhərində Gömrük və Logistika üzrə Səlahiyyətli İqtisadi Operatorların Beynəlxalq Assosiasiyasının illik Assambleyası və Konfransı keçiriləcək.

Dövlət Gömrük Komitəsindən (DGK) verilən məlumata görə, bu tədbiri adıçəkilən beynəlxalq assosiasiya və DGK birgə təşkil edir. Konfransda 25 ölkədən 150 nümayəndənin iştirakı gözlənilir.

Toplantının açılış mərasimində DGK sədri Səfər Mehdiyev və Gömrük və Logistika üzrə Səlahiyyətli İqtisadi Operatorların Beynəlxalq Assosiasiyasının prezidenti Antonio Llobet iştirak edəcək. Məruzəçilər sırasında Səlahiyyətli İqtisadi Operator (SİO) proqramının dünya üzrə lideri Lars Karlsson da olacaq. Tədbirə gömrük orqanları, logistika və nəqliyyat şirkətlərinin nümayəndələri qatılacaq.

SİO konsepsiyası Ümumdünya Gömrük Təşkilatı tərəfindən təqdim edilən gömrük-biznes əməkdaşlığına əsaslanır. SİO meyarlarına könüllü şəkildə riayət edən ticarətçilər təchizat zəncirinin təhlükəsizliyi üzrə ümumi məqsədə nail olmaq üçün gömrük orqanları ilə əməkdaşlıq edirlər. Gömrük və vergi qanunvericiliyinin tələblərinə riayət olunması sahəsində təcrübəyə malik və iqtisadi fəaliyyət üzrə heç bir hüquqpozmaya yol verməyən, müvafiq təhlükəsizlik və mühafizə tədbirlərini təmin edən, məlumatların qeydiyyatı üzrə qənaətbəxş sistemə və maliyyə imkanlarına malik şirkətlərə gömrük xidməti tərəfindən SİO sertifikatları verilir.

Səlahiyyətli İqtisadi Operatorlar gömrük prosedurları ilə bağlı imtiyazlardan yararlanmaq hüququ əldə edirlər. Beynəlxalq təchizat zənciri təhlükəsizliyinin gücləndirilməsi və qanuni ticarətin asanlaşdırılması məqsədi daşıyan SİO proqramı təchizat zəncirinin bütün iştirakçıları üçün açıqdır.

Bu gün Azərbaycan beynəlxalq ticarətdə strateji nəqliyyat və logistika mərkəzidir. Beynəlxalq ticarətdə baş verən yeniliklər gömrük qarşısında yeni tələblər deməkdir. Bakıda keçiriləcək SİO Beynəlxalq Konfransı gömrük-biznes əməkdaşlığında maraqlı olan şirkətlər üçün nəzərdə tutulur. Konfransda təhlükəsiz biznes mühitinin başlıca elementləri, SİO proqramı üzrə dövlət və özəl sektor təcrübəsi, blok zənciri, gömrük və logistika əməliyyatları kimi təchizat zəncirinin təhlükəsizliyində mühüm əhəmiyyət kəsb edən məsələlər müzakirə olunacaq.

Konfransın proqramına yeni Bakı Beynəlxalq Dəniz Ticarət Limanına tanışlıq səfəri də daxildir.

© Materiallardan istifadə edərkən hiperlinklə istinad olunmalıdır
  • $ USD
    1.7000
  • € EUR
    2.0016
  • ₽ RUB
    0.0276