BİRJA

SOCAR İstiqrazları üzrə növbəti faizlər ödənildi
17 APREL
275

SOCAR İstiqrazları üzrə növbəti faizlər ödənildi

2018-04-17 10:45:00

Aprelin 17-də SOCAR istiqrazları üzrə növbəti faizlər ödənilib. “SOCAR Capital” şirkətindən verilən məlumata görə, SOCAR istiqrazlarının sahiblərinə hər istiqraza görə 12,5 dollar olmaqla, ümumilikdə 1 milyon 250 min dollar vəsait ödənilib. Bu, istiqrazlar üzrə 6-cı faiz ödənişidir, bununla da SOCAR istiqrazları sahiblərinin qazancı 7,5 milyon dollara çatıb.

“SOCAR Capital”dan bildirilib ki, istiqrazlar üzrə faiz ödənişi üçün tələb olunan vəsait Milli Depozit Mərkəzinin (MDM) Mərkəzi Bankdakı hesabına bir həftə əvvəlcədən köçürülüb: “Faiz ödənişi üçün tələb olunan 1,25 milyon dollar vəsait aprelin 10-da MDM-in hesabına ödənilib. Artıq bu gündən həmin vəsaitlər istiqraz sahiblərinin bank hesablarında olacaq”.

Şirkətdən qeyd edilib ki, SOCAR istiqrazlarının buraxılmasından ötən 1,5 il ərzində istiqrazlara xidmət və faiz ödənişləri intizamla yerinə yetirilib: “İstiqrazların buraxılışı zamanı elan edildiyi kimi, SOCAR digər qiymətli kağızlarda olduğu kimi, daxili istiqrazlar üzrə də öhdəliklərinə ciddi surətdə əməl edir. Nəticədə SOCAR istiqrazları ölkədə ən etibarlı və likvid maliyyə alətinə çevrilib”.

SOCAR-ın 2016-cı ildə daxili bazar üçün buraxdığı istiqrazların nominal qiyməti 1000 ABŞ dolları, illik gəlirliliyi 5 faiz və ya hər istiqraza görə ildə 50 dollardır. İstiqrazlar üzrə faizlər 3 aydan bir olmaqla, ildə 4 dəfə ödənilir.

SOCAR bu istiqrazlara nominal qiymətdən alış zəmanəti də verib, nəticədə istiqrazların qiyməti heç vaxt 1 000 dollardan aşağı enmir və istiqraz sahibləri onları dərhal nağd pula çevirə bilir.

Gəlirliyin və likvidliyin yüksək olmasına görə, SOCAR istiqrazları bazarda ən sərfəli yatırım aləti sayılır. Əhali və hüquqi şəxslər istiqrazlara böyük maraq göstərirlər. Nəticədə təkcə 2018-ci ildə SOCAR istiqrazları ilə əməliyyatların həcmi 19 milyon dolları keçib. İstiqrazın alıcıları arasında təkcə Azərbaycan deyil, xarici ölkələrin vətəndaşları da var.

2021-ci ilədək qüvvədə olan SOCAR istiqrazları bu müddətin sonunadək öz sahiblərinə 25 milyon ABŞ dolları həcmində gəlir gətirəcək.

Ölkə vətəndaşları, eləcə də yerli və xarici fiziki, hüquqi şəxslər SOCAR istiqrazlarını təkrar bazardan əldə edə bilərlər. Bunun üçün onlar “ASAN xidmət”in 1 və 5 saylı Xidmət Mərkəzlərinə, eləcə də *19 99 Qaynar xəttə müraciət etməlidirlər.

© Materiallardan istifadə edərkən hiperlinklə istinad olunmalıdır
  • $ USD
    1.7000
  • € EUR
    1.9314
  • ₽ RUB
    0.0256