SƏNAYE

Ekspert aqrar sektorun dinamik inkişafını ləngidən əsas maneələrdən danışdı
26 NOYABR
136

Ekspert aqrar sektorun dinamik inkişafını ləngidən əsas maneələrdən danışdı

2018-11-26 15:41:00

Prezident İlham Əliyev tərəfindən noyabrın 15-də təsdiqlənmiş “Azərbaycan Respublikasında peyk vasitəsilə Yerin məsafədən müşahidəsi xidmətlərinin inkişafına dair 2019–2022-ci illər üçün Dövlət Proqramı” yaxın dörd il ərzində iqtisadiyyatın digər sahələri ilə yanaşı, kənd təsərrüfatının idarəedilməsində mühüm məlumat bazasının toplanmasını nəzərdə tutur.

Bunu Fins.az-a açıqlamasında “Ərzaq məhsullarının tədarükü və təchizatı” ASC-nin şöbə müdiri, kənd təsərrüfatı məsələləri üzrə ekspert Nicat Nəsirli deyib.

Onun sözlərinə görə, proqramda aqrar sektor üçün nəzərdə tutulmuş istiqamətlər elektron kənd təsərrüfatının mühüm komponentlərinin yaradılmasını təmin edəcək: “Çünki müasir terminologiyada “elektron” və ya “ağıllı” adlandırılan, çevik idarəolunan kənd təsərrüfatının qurulması üçün torpaq, bitki, hava məlumat datalarının formalaşdırılması son dərəcə vacibdir. Peyk müşahidələri sisteminin qurulması ölkə ərazisinin rəqəmsal xəritələrinin hazırlanmasına imkan verəcək. Bu xəritələrin hazırlanması kənd təsərrüfatı məhsullarının istehsalına və emalına dair Strateji Yol Xəritəsində mühüm vəzifə kimi müəyyən olunub. Rəqəmsal xəritələr torpaq üzərində istehsal fəaliyyətinin qurulmasında mühüm bir məlumat bazasıdır”.

İnkişaf etmiş ölkələrdə kosmik xidmətlərdən son illər geniş istifadə olunur. Bu barədə danışan Nicat Nəsirli qeyd edib ki, bu xidmətlərin iqtisadiyyatın digər sahələrində olduğu kimi, aqrar sahəyə təsirləri də genişmiqyaslıdır, səmərəli idarəetməni təmin edir. Bu mənada, yeni proqramda nəzərdə tutulmuş istiqamətlərin həyata keçirilməsi ölkədə sosial-iqtisadi və texnoloji inkişafa təkan verəcək, milli kadr potensialının formalaşdırılmasına yol açacaq. Proqramda qoyulmuş strateji hədəflər kənd təsərrüfatı sahəsi ilə yanaşı, ətraf mühitin mühafizəsi, fövqəladə halların idarə edilməsi, meliorasiya və su təsərrüfatı sahələri, nəqliyyat və yol infrastrukturu, turizm, xəritəçəkmə və şəhərsalma, kadastr, naviqasiya və digər sahələrdə peyk müşahidəsi xidmətlərindən istifadə edilməsinə gətirib çıxaracaq, qeyd olunan sahələrin sürətli inkişafına, elmi-tədqiqat işlərinin səmərəliliyinin yüksəldilməsinə təkan verəcək.

“Etiraf etməliyik ki, bu gün aqrar sektorumuzun dinamik inkişafını ləngidən əsas maneə məlumat datalarının olmamasıdır. Bu, elə məlumatlardır ki, artıq onu subyektiv yollarla əldə etmək mümkün deyil, hökmən peyk vasitəsilə dəqiq müşahidələr olmalı, əldə edilən informasiyalar əsasında tədbirlər planı icra olunmalıdır”, - deyən ekspert bildirib ki, proqramın icrası nəticəsində peyk müşahidəsi xidmətlərindən fəal istifadə edilməsi kənd təsərrüfatında aşağıdakı nəticələrin əldə olunmasına imkan verəcək:

- əkinəyararlı torpaqların inventarlaşdırılması imkan verəcək ki, dövriyyədə olan torpaqların uçotu aparılsın, nə qədər sahələrin əkildiyi məlum olsun;

- əkin altında olan və olmayan torpaqların keyfiyyət göstəricilərinin müəyyən olunması asanlaşacaq, müxtəlif səbəblərdən baş verən dəyişiklərin (torpaq resurslarının eroziya və deqradasiya proseslərinin dəqiq monitorinqi) müntəzəm monitorinqi həyata keçiriləcək;

- əkilən bitkilərin vegetasiya mərhələlərini nəzarətdə saxlamaq, eləcə də fitosanitar müdaxilələrin vaxtında aparılması, sahələrdə yayılan xəstəliklərin və onların yayılma arealının müəyyən olunması asanlaşacaq;

- əkin sahələrində lazımi həddə gübrələmənin aparılması, bitkinin potensial məhsuldarlığının proqnozlaşdırılması;

- kənd təsərrüfatının inkişafında ən mühüm addımlardan biri olan sığorta sisteminin qurulması üçün əkinlərin qiymətləndirilməsi, fermerlərə dəymiş zərərin miqyasının müəyyən edilməsi;

- torpaqlardan səmərəli istifadə, növbəli əkin sisteminin qurulması üçün məlumat bazasının yaradılması;

- meliorasiya və su təsərrüfatı sahəsinin inkişafının planlaşdırılması;

- torpaqlardan təyinatı üzrə istifadəyə nəzarət və torpaqlardan faktiki istifadənin monitorinqi.

“Beləliklə, proqramın icrası uğurla həyata keçirilərsə, aqrar sektorumuzun informasiya tutumu artacaq, dəqiq analizlərin aparılması mümkünləşəcək”, - deyə Nicat Nəsirli bildirib.

© Materiallardan istifadə edərkən hiperlinklə istinad olunmalıdır
  • $ USD
    1.7000
  • € EUR
    1.9335
  • ₽ RUB
    0.0255