SƏNAYE

Azərbaycanda tütün istehsalı xeyli arta bilər
27 İYUL
170

Azərbaycanda tütün istehsalı xeyli arta bilər

2018-07-27 11:17:00

2018-ci ilin sonunadək Azərbaycanda tütün istehsalının həcmi 30 faiz arta bilər. Bunu Tütün İstehsalçıları və İxracatçıları Assosiasiyasının sədri Telman Həsrətov deyib.

T.Həsrətov bildirib ki, tütün yığımına, demək olar, bu yaxınlarda başlanılıb: "Lakin biz artıq ilin sonunadək istehsalatda nəzərəçarpacaq artım gözləyirik. Hazırda daha çox tütün Balakən, Şəki, İsmayıllı, Qəbələ, Lerik və Masallıda istehsal olunur".

O qeyd edib ki, Azərbaycan tütününün əsas ixrac istiqamətləri Belarus və Rusiyadır: "Azərbaycanda istehsal olunan tütünün əsas hissəsi daxili bazara gedir". Assosiasiya sədrinin sözlərinə görə, istehsalla yanaşı, 2018-ci ilin sonunadək tütün ixracını da artırmaq planlaşdırılır.

Hazırda istehsalçılar üçün sərfəli olmayan alış qiymətinə gəlincə, T.Həsrətov deyib ki, bu məsələ ilə bağlı qərar iyulun 27-də Kənd Təsərrüfatı Nazirliyi tərəfindən Zaqatalada keçirilməsi gözlənilən müşavirədə qəbul ediləcək:

"Bu müşavirədə tütün istehsalçılarının kreditləşdirilməsi məsələsi də müzakirə olunacaq. Bundan başqa, tütünün əkin sahələri də genişləndiriləcək. 2017-ci ildə Zaqatalada tütün istehsalı üçün 600 hektar ərazidən istifadə olunub, 2018-ci ildə isə bu sahə 800 hektaradək artırılıb".

Onun sözlərinə görə, tütün istehsalçıları, həmçinin texnika parkını yeniləməyi planlaşdırırlar. Dövlət Gömrük Komitəsinin məlumatına əsasən, 2018-ci ilin yanvar-iyun aylarında Azərbaycan 5,52 milyon dollar dəyərində tütün və onun sənaye əvəzedicilərini ixrac edib, 60,1 milyon dollarlıq isə idxal həyata keçirib. Ötən ilin analoji dövrünün göstəricisi ilə müqayisədə ixrac 9,06 faiz, idxal isə təxminən 17 faiz azalıb. (TREND)

Eləcə də bax: Bu il istifadəyə verilən obyektlərin SİYAHISI açıqlanıb

© Materiallardan istifadə edərkən hiperlinklə istinad olunmalıdır
  • $ USD
    1.7000
  • € EUR
    1.9673
  • ₽ RUB
    0.0259