SƏNAYE

Qaxda böyük aqroparklar yaradılır
09 FEVRAL
170

Qaxda böyük aqroparklar yaradılır

2018-02-09 10:05:00

Qax rayonunda da aqroparkların yaradılması istiqamətində işlər görülür. “Ulu-Aqro” MMC-nin icraçı direktoru Məhərrəm Məhərrəmov müsahibəsində aqroparkın infrastrukturunun tikintisi istiqamətində görülən işlər, həmçinin ötən təsərrüfat ilində bitkiçilik məhsulları istehsalında əldə olunan nəticələr barədə söhbət açıb.

Müsahibimiz bildirib ki, rayonun Ağyazı kəndinin ərazisində yaradılan aqroparkın ümumi sahəsi 2044 hektardır. Dənli və paxlalı bitkilərin əkini üzrə ixtisaslaşan aqroparkda, eyni zamanda, bağçılıq və kənd təsərrüfatının digər sahələrinin inkişafı da nəzərdə tutulur. Hazırda aqroparkın ərazisində taxıl anbarlarının, texnika parkının, yanacaqdoldurma məntəqəsinin, həmçinin infrastrukturun tikintisi başa çatmaq üzrədir. Ərazinin suvarma suyu ilə təmin olunması məqsədilə 4,5 kilometr uzunluğunda daşıyıcı su xətti çəkilib. Aqroparkın Daşüz adlanan ərazisində 15 ədəd dairəvi suvarma sistemi quraşdırılıb. Habelə 23 ədəd müxtəlif növ kənd təsərrüfatı texnikası alınıb.

Eləcə də bax: Qrant alan sahibkarlar layihələrini ictimaiyyətə təqdim edib

Aqroparkda 277 hektarda badam və qoz, 138 hektarda isə alma, armud, şaftalı və ərik bağlarının salınması planlaşdırılır. Ərazi hazır vəziyyətə gətirilib və indiyədək 50 min tingin əkilməsi təmin olunub. Hazırda yeni salınacaq meyvə bağları üçün damcılı suvarma sistemi quraşdırılır.

Məhərrəm Məhərrəmov deyib ki, ötən il aqroparkın ərazisində əkilmiş 244 hektar buğda sahəsindən 922 ton, 43 hektar günəbaxan sahəsindən 82 ton, 33 hektar qarğıdalı sahəsindən 132 ton, 50 hektar soya sahəsindən isə 71,7 ton məhsul əldə olunub. 2018-ci ilin məhsulu üçün payızlıqların əkini genişləndirilərək 1553 hektara çatdırılıb. Ötən il buğda sahəsinin hər hektarından 38 sentner məhsul götürülüb. Cari ildə isə məhsuldarlığın 50 sentnerə çatdırılması qarşıya hədəf olaraq qoyulub.

© Azərtac

© Materiallardan istifadə edərkən hiperlinklə istinad olunmalıdır
  • $ USD
    1.7000
  • € EUR
    2.0069
  • ₽ RUB
    0.0273